80後港人英國開黃店超市 撐抵英年輕抗爭者溫飽

80後港人英國開黃店超市 撐抵英年輕抗爭者溫飽

在英國,提到要購買中式食品及產品,首先想起的是四大連鎖華人超市。三年前,有香港人來英國創立了一間網上亞洲食品超市「華南行」,除售賣各類型的亞洲食品外,也盡力引入更多香港品牌及產品。華南行曾經隨貨附送抗爭文宣、引入黃色經濟圈產品、捐錢給612人道支援基金,逐漸為移英港人所認識,有人形容華南行是「英國黃店」,對此創辦人說來淡然,這一切,他只認為「有時有啲嘢你覺得要做、應該做,就會去做㗎啦」。

駐英記者李雨夢報道

華南行的倉庫位於東倫敦,踏進倉庫,數名員工正忙着執貨、砌貨,而負責人Magic在電腦面前,穿上紅色的華南行制服,埋首工作,小小的辦公角落,與倉庫融為一體。堆滿貨架的貨櫃上面,有來自香港、日本、韓國、泰國、台灣、中國的產品,熱浪薯片、樂天熊仔餅、冠益華記辣椒醬等在香港常見而英國罕見的產品,在華南行都有存貨。

Magic於2018年創立華南行,當時他還未到30歲。談到創業的緣起:得從他大學畢業後的故事說起,大學畢業之後,才20出頭的他申請到英國工作假期,先後在印度及韓國的食品公司工作過,後來回到香港,又在太古可口可樂上班,一直都在從事與食品有關的行業。在香港工作了一段時間後,還是覺得英國的環境較為適合自己,於是嘗試聯絡工作假期時的僱主,為他辦了工作簽證,再到英國工作。

華南行的貨架,有來自香港、日本、韓國、泰國、台灣、中國的產品,熱浪薯片、樂天熊仔餅、冠益華記辣椒醬等在香港常見而英國罕見的產品,在華南行都有存貨。

堅持引入香港產品

輾轉又兩年,工作簽證快要過期,迫使Magic思考下一步該怎麼走,「一係就返香港搵另一份工,一係搵過另一個僱主,最尾決定不如自己創業」。當年創業,是受到HKTV轉型成HKTVmall所啟發,又看到英國缺乏這方面的市場,思前想後,覺得可以一試,於是他去申請Tier 1企業家簽證,華南行便是在這樣的情況下誕生,「以上網形式去賣亞洲食品,開頭得我一個,嗰時覺得個market係可以做到,好多人都唔係住喺大城市,要買一種亞洲調味料,可能係花椒,但搵唔到,可能上網買係最方便」。

在籌備創業的階段,Magic已經希望能夠引入多些香港品牌及產品,「一來我認識啦,二來係我認識嘅香港牌子入面,好多質素好好,好似醬油類、豆豉,我自己一直都係用開,價錢又得,質素又得,我咪盡力去做香港品牌嘅推廣」。點進華南行的網頁,有廖孖記、同珍、九龍醬園、冠益華記、淘大等香港品牌的調味料,然而Magic表示,這個過程並不容易,「唔係咁多香港產品可以嚟到英國,我哋好細間,無辦法做到想要個牌子,就令到個牌子喺英國出現」。

但在供應清單有提供的香港品牌與產品,Magic都會盡量購入,「變相有啲香港貨品係由歐洲過嚟,可能喺歐洲已經有人入咗,有啲係西班牙,有時係荷蘭,有時係德國,變相係咁樣去搜羅」。萬事起頭難,開始時候,只有他一個人,華南行沒有人認識,能夠入到的貨品種類又少,幾乎是全天候工作,無法好好休息,「好驚自己病,唔可以準時出貨,有啲客人會話你嘅選擇好少」,那段日子,精神壓力龐大,情緒上亦會感到低落,不時也有產生放棄的念頭。

受到HKTVmall啟發,又看到英國缺乏這方面的市場,Magic思前想後,去申請Tier 1企業家簽證,創立了華南行。

隨貨附送文宣 引入黃色經濟圈產品

之後那年,香港爆發反送中運動,當時身處英國的他,只能在異地觀看香港發生的一切一切,「我哋喺外地好無助,最多只係不斷去refresh個Facebook、新聞,睇發生緊咩事,無咩可以做到」。無力的情緒不斷湧現,後來看到有Telegram的群組裏有人問,有沒有人可以在英國幫忙派發已繙譯好的文宣,將資訊散播到海外,「無咩可以做到時,突然間個group問有無『手足』可以喺海地raise到多啲noise,我哋可以喎,我話我呢邊有間公司,盡力囉,派到幾多得幾多」。

於是,在那時開始,每當接到定單,Magic都會將印製好的文宣,隨貨附送。「有時有啲客都會feedback返,都正面,起碼唔係擺完落去無人睇,有人會留意到多啲香港嘅事情同經過」。只是,華南行的客人不只香港人,或會有來自其他地方的華人,包括中國人。有人問過Magic,會否擔心這樣的行為而得失中國客?Magic說,自己在做事情的時候,其實沒有想得太多,只想要把正確的訊息宣揚出去。

香港反送中運動爆發,Magic看到有Telegram群組有人問,有沒有人可以在英國幫忙派發已繙譯好的文宣,將資訊散播到海外,於是就開始在英國派發文宣。

每次都是事後有人問起,他才去思考這一個問題,「無咩掙扎,做緊啲咁微不足道嘅嘢,無特別去思考咁多」,而他也樂觀地認為,不會對生意帶來太大的影響,對此Magic是有這樣的見解:「可能佢本身未出嚟英國前接受好單方面教育同灌輸,突然order完一次見到張文宣,可能第一下好唔同意,但再慢慢接觸多啲新聞,可能係會改變到佢嘅思維,個政權出咗啲問題,係咪可以係咁樣?唔使咁負面嘅。」

前一陣子,華南行引入了設計平台Project R的產品,包括印有「HONGKONGER」字眼的衛衣及「自由之籽」帆布袋,對於當初引入這類產品的想法,Magic說,是透過團體認識到Project R的負責人,由於認同這個平台的信念,又認為是優質的產品,故決定引入,「香港人設計已經夠珍貴,亦係台灣製造,我哋都好多台灣客同台灣產品,雖然我哋未賣過服裝,但我哋覺得好嘅產品一定有人賞識,所以就開始咗,同埋Project R成個概念係好好」。

華南行引入了設計平台Project R的產品,包括印有「HONGKONGER」字眼的衛衣。

賣中國貨惹來爭議

從發放文宣,到引入黃色經濟圈的產品,去年曾將一天的營業額不扣除成本捐給612人道支援基金,在別人眼中或許已是一種表態,但Magic對此只淡然地道:「我又唔覺得我地特別好表態去做某啲嘢,有時有啲嘢你覺得要做、應該做,就會去做㗎啦。」也因如此,在移英港人群體心中,對於華南行亦有了一定期望,例如是否可以引入更多香港黃色經濟圈的產品,賣中國製產品亦會惹來爭議。

對於引入更多香港黃色經濟圈的產品,Magic明言實質操作有局限,就好像很多客人希望華南行可以售賣被視為「黃」的悅和醬園產品,但礙於沒有英國進口許可證,也無法進口數量龐大的批次,故直接從香港入口產品對他而言有一定難度,「好多香港產品我哋都好想要,但好多唔同因素,又無入口證,又要睇吓係咪要做lab test,有效期可唔可以afford到個船運,我哋做唔做到minimal (minimum) order……」他嘗試聯絡過香港出口商會,但對方只給予他一份印有幾千個出口商名單的PDF,着他自行聯絡。

華南行引入了設計平台Project R的產品,包括「自由之籽」帆布袋。

至於售賣中國製產品惹來的爭議,Magic沒有預料得到,也是到了後期才感到無奈。當有客人質疑,他便會作出解釋,在互相溝通的過程中,也讓他獲取到更多的資訊,「有啲唔係真係咁負面嘅,可能話你賣中國嘅乜乜乜,其實有唔係中國嘅乜乜乜,你講完之後我哋咪去睇吓,原來供應商上面真係有喎,咁做囉」。客人的意見及回應,他都嘗試努力聆聽。

營運逐漸穩定 初心不變

走過這三年,從一開始寂寂無聞、無法出糧給自己,不時萌生放棄結業的念頭,到現在開始逐漸多人認識,目前已聘請了5、6名員工,大部份都是香港人,倉庫亦已搬過一次。過去一年,COVID-19疫情肆虐,英國是疫情重災區,曾經三度封城,封城狀態下,網上購物逐漸成為趨勢,而由於華南行售賣必需品,故不用被迫停業。

華南行目前已聘請了5、6名員工,大部份都是香港人。

獨自在外創業,沒有親人在身邊,Magic明言員工變相就是他在英國最親的親人,「每個我都好重視」,也因為公司維繫着每個員工的生計,故也努力繼續將華南行營運下去,「成間公司最重要係員工,我唔想請佢哋返嚟,跟住同佢哋講,真係做唔落去、要執,我唔想見到咁,盡量想避免呢個情況」。

最近,Magic亦為匆忙抵英的香港年輕抗爭者提供現金券支援,希望能讓他們有基本的溫飽,「我哋都係聽到有啲後生仔嚟到好急趕,準備都冇咩,咁做到咩就盡力做。派咗啲現金券畀佢哋買嘢,起碼食飽飯照顧好自己,同埋佢哋一個人嚟,擔心佢哋心態上會好孤單,所以希望畀到啲溫暖佢哋」。

對於華南行,對於他自己,Magic強調初心沒有改變過,「我一開始初衷係想開間網上超市,我心態係,有收入時你願意撥一啲去幫有需要嘅人,我一直都係咁嘅睇法,我無變過啊」。

Magic強調初心沒有改變,「我一開始初衷係想開間網上超市,我心態係,有收入時你願意撥一啲去幫有需要嘅人,我一直都係咁嘅睇法,我無變過啊」。