全職從政打國際線 許智峯開Patreon論政:立即就想同老共死過!

全職從政打國際線 許智峯開Patreon論政:立即就想同老共死過!

近月移民成為香港人熱話,但唔少人心中所謂移民其實係走難。流亡英國嘅前立法會議員許智峯,為咗擴闊國際戰線,未來亦唔會定居英國,考慮轉到其他「五眼聯盟」國家。佢今日喺Facebook宣佈開設Patreon,邀請公眾支持。

唔少政治人物都有開設Patreon,喺個人專長範疇或就國際時事分析,計落阿峯都叫遲起步,但原來佢開Patreon都有不足為外人道嘅掙扎。佢喺Facebook透露,超過一年前已經被人問起點解唔開Patreon?原因好簡單,當時佢做緊區議員、立法會議員,有議員酬金、營運開支津貼,生計唔係問題,加上有團隊幫忙,所以若要公眾課金支持,自己都過意唔去。而佢當時認為自己唔係擅長宣傳自己嘅人,希望踏實做好議員本分。

阿峯話,雖然佢而家流亡海外,但從冇擔心過生計,只係希望可以全職從政,專注國際戰線工作,故此戰戰兢兢開Patreon。佢提到早幾日同另一位流亡港人張崑陽通電話,對方問佢啱啱出走,係咪需要安頓一下?但阿峯就話唔使:「我立即就想同老共死過!」

佢亦開始接受好多外媒訪問、會見海外政界。雖然而家阿峯嘅Patreon未有嘢睇,但唔少網民都留言話支持佢,感謝佢繼續為香港發聲。